May 20, 2009

點心

假日走到超級市場時,見到一小食攤檔,售賣各樣中式點心,我在玻璃櫃內展示的點心掃了一圈,發現了久違的糯米包,我立刻跟服務員要了兩個。服務員亦算盡責,我付款後,她從玻璃櫃拿出點心,先放到微波爐翻熱,才交到我手。

記憶中最後一次吃糯米包已好像是兩三年前的事,那一次叫了一籠糯米包,打開蓋才發現糯米包的皮是白色,不是傳統的黃色。不知是我住的地區還是那一家酒樓的級數問題,有一些點心,不是消失了,就是變了樣。

芝麻卷
小時候最喜歡吃的一款甜點心,現在很多酒樓都沒有在茶市供應,一些素菜館仍然有在門前擺賣,我亦曾經買過,原來素菜館售賣的點心,都是油膩有餘而味道不足,印象中我在鴻星酒家吃過,它們不油膩,顏色亦比普通的深色,味道十分濃郁。看來這一款假菲林要比真菲林還要早消失。

雞包仔
以往跟家人飲茶,爸爸必定會要叉燒包,我就會要一籠雞包仔。爸爸只會吃一個叉燒包,剩下的兩個都要大哥或我幹掉,而我那一籠雞包仔,他們都不感興趣,最後都是我一個人吞下三個。說雞包仔是鹹點心嗎,但它的味道真的很淡,只有雞肉,加上一些蔥或是菜,但不知那一個有創意的點心師父,居然在雞包仔加入蝦仁,我已經不止一次吃到這一款蝦仁雞包仔。

奶皇包
很多人喜歡吃流沙奶皇包,但我卻更懷念那一款不會流出的奶皇餡料,個人口味問題吧,但原來製作一個奶皇包時,要做出流沙效果,餡料要用五克油(約一茶匙)和半隻鹹蛋黃,而外皮亦要用三克豬油。如果現在要找到這一款(不流沙)奶皇包,一定要到酒樓以外的地方,超市急凍點心,或一些售賣點心的攤檔。

糯米雞
已經完全被珍珠雞取代,記憶中一個足料的糯米雞有冬菇、雞翼、鵪春蛋、臘腸、豬肉、叉燒、鹹蛋黃,可能會記錯的,因為真的太多年沒有在酒樓吃過一個糯米雞,現在要吃大大個的糯米雞,去大家樂這一類連鎖快餐店吧!

荷葉飯
跟糯米雞差不多大小,沒有什麼餡料,只是一塊荷葉包著炒飯蒸熱,令到荷葉的香滲到炒飯內。點心阿姐把熱騰騰的荷葉飯送到桌上,用剪刀仔細在上面剪出一個圓形,真的很懷念那荷葉的清香味。但當冷卻後,跟普通的炒飯無異。

馬拉糕
現在的馬拉糕跟往日的差別?往日的較為厚(高),顏色較深色,接近啡色,而不是今天那種淺黃色,味道亦比較甜。

腸粉
今天的腸粉真的小了很多,單看那個碟子已經知道,再說那粉皮,亦都較以往的薄,味道反而不是差很多。

冷糕點
小時候跟父母去飲茶,最後必定會等待那一輛放滿糕點的手推車,記得車上都有忌廉蛋糕、芒果布甸、椰汁糕、啫喱,回想當時手推車上的甜品,差不多每一款都會插著一只小小的紙傘,我記得每次吃過甜品後,都必會把小紙傘帶走。今天要吃這一類糕點甜品著實不難,但好像已經沒有那一把紙傘。

11 comments:

  1. 灌湯餃.......
    唔係一盅盅燉嗰隻.......係用蒸籠蒸出嚟嗰隻.......裡面有兩隻"L"形好似book end咁既鐵器皿, 仲要有窿既, 裝住熱辣辣既灌湯餃, 食個陣要好小心, 一係就辣親個嘴, 一係就啲湯和餡瀉晒.......

    錦鹵雲吞
    細個成日食, 出嚟做嘢廿幾年食唔夠三次, 最近一次食應該係十二三年前, 邊度仲有得食呢?

    黑膠菲林.......my飛佛......好似仲有橙色同埋黃色!

    我都係鍾意舊時唔流沙既奶皇飽, 我覺得清甜啲, 而家嗰啲太creamy & sticky!!!

    仲有銀針粉同埋白糖糕

    ReplyDelete
  2. Alan So:
    灌湯餃....原來都想寫,但兒時的灌湯餃真的貴,亦唔係經常食,所以並唔係太過記掛呢一樣食品,你講的那個器具,我有印象,好似係檸檬夾 lemon squeezer 的外型咁的,如果我無記錯,呢一款灌湯餃係有酒樓出番,因為唔記得今年定上年睇過一個電視節目有介紹過。

    錦鹵雲吞....細個時經常叫「感冒雲吞」,哈哈,呢一樣真係較少食,係網上一查,原來係油麻地美都餐室有得食。

    橙色、黃色的菲林,我無乜印象。

    一個銀針粉,一個瀨粉,最怕食,用筷子同匙羹都係好難攪得掂。

    白糖糕,都重有地方有得賣的,不過鍾意食的人話甜,唔鍾意食的人話酸。

    其實原來我重想寫另一款甜品,西瓜盅,睇下開多篇定係再加落去。

    ReplyDelete
  3. 係呀! 仲有西瓜盅, 細個飲茶經想扭計話要食, 但係多數都係失望, 因為好似係大點嚟, 呀媽一定唔叫!

    Tat兄如果知道邊間酒樓有灌糖餃食, 麻煩告知小弟!!

    其實白糖糕唔係真係咁好食㗎, 不過係我既童年回憶裡面絕對少不了!!!! 就係懷念嗰種酸唔酸, 甜唔甜!!!

    搵日約埋眾友人食番晒以上所有點心.....越講越想食!!

    忽然諗起, 甜品車上應該仲有杏仁豆腐(大菜糕).....有幾粒雜果係上面嗰隻!!

    ReplyDelete
  4. 杏仁豆腐花,好耐無食過,今年初食過一種,好似百褔出的,但係呢,又唔可以話錯,係一種有杏仁味道的正規豆腐花,入口即溶化。並唔係個一種較硬,近似啫喱、大菜糕的硬度的「假」豆腐花。

    超市好似有杏仁豆腐花的粉賣呢!!!

    ReplyDelete
  5. 咦,點解我昨天打的一段留言不見了??

    ReplyDelete
  6. Re: readandeat <6508388657181055080>
    你可能操作上的問題,打了一大段字,後後按錯的什麼,最後什麼都沒有儲蓄,我都試過多次呢!

    ReplyDelete
  7. 嗚……所以我好憎去鮮奶國留言,因為成日都唔見晒我打嘅字。想不到……

    言歸正傳。

    我記得菲林有黃色(橙色)的。經典的吃菲林方法是,先將菲林拉開成一塊布咁,然後一啖啖咬。

    錦鹵雲吞我也記得,那些甜酸醬很好味。

    我也喜歡吃銀針粉,最喜歡啜一聲吞入口。

    荷葉飯,現在很少茶樓有荷葉飯了。

    奶黃包我麻麻地愛,我鍾意吃麻蓉包。

    千層糕我也愛吃,香港茶樓少見。反而有一次在深圳酒樓吃到。

    我喜歡吃雞扎和棉花雞呀﹗腸粉麻麻鍾意,我喜歡大排檔的腸粉多啲。

    我也是喜歡那把遮仔。好像是放在啫喱度的。

    ReplyDelete
  8. tat:

    你細個有無食過蛋花大菜糕呀!

    readandeat:

    你食菲林既方法同我一樣......哈哈!

    其實蛋黃蓮蓉包都係我既摯愛, 仲要係新鮮蒸好嗰隻....好味!

    千層糕, "賣飛佛" too!!!

    ReplyDelete
  9. Alan,
    大菜糕,我唔係咁鍾意食咋。
    食菲林的方法,正如readandeat所講,正!

    睇咗今期 U Magazine,講中式老餅喎!

    ReplyDelete
  10. 白糖糕。。。細個成日食

    乾蒸牛肉。。。而家成日得山竹

    ReplyDelete
  11. Re: naruto <563066622352124169>
    你同Alan都鍾意食白糖糕,有機會去深水埗買俾你地食呀!!

    ReplyDelete